HRUAITU RETREAT 2014

KRISTIAN THALAI PAWL : KAWNPUI CHHIMVENG BRANCH
HRUAITU RETREAT

A hun : 25th October 2014 (10:00am)
A hmun : Committee Room No-II
                Thupui : HRUAITU MAWHPHURHNA

Buatsaihtu : Upa R.Rohmingliana

        Kan thupui hi a zau hle maia, a zauh ang hian kan zirho mai dawn a ni. Hetiangin -

1. Hruaitu chu eng nge a niha? Eng nge a tihtur ?

Hruaitu chu a thu ang mai hian mite hmaa kala, an hmabak chu kalna chi a ni em? Kal ngamna a ni em ? A hnung a mite tan an kalna chu kawng dik a ni em tih hriaa, zuitlak nia hmahruaitu a ni tur a ni.

Hruaitu tih leh Hotu tih hi kan sawi pawlh nawk nawk thin. Mahse, a nihna danglam daih si a ni. Hotu chu thupetu, a hote hnena tihtur kawhhmuha ‘Ti rawh u’, ‘Thawk rawh u’ tia rela. A hote tihtur kawhhmuhtu a ni. Isua chu kohhran hotu leh lu tiin kan sawi thin, a dik renga. Amah chu engkima kan engkim, Lu-ah chuan hriatna  (Thluak) a awma, engkim kan hmuh theih nan Mit a awma, ri kan hriat theih nan Beng a awma, rim kan hriat theih nan Hnar a awma, engkim kan ei theih nan Ka a awma, a tui leh tui lo kan hriat theih nan Ha a awma, kan tawng theih nan Lei a awma, kan thawk theih nan Hnar a awma, mihring kan nihna zawng zawng hi kan Lu-ah hian a awm khawm vek a ni. Chutiang chuan, kohhran ho leh ringtute lu chu Isua a ni. Hotu a nihna chuan thupetu, tihtur kawhhmuhtu a ni. Chanchintha hrilturin thupek a chhuaha, rawngbawl turin thupek a pe a. Ringtu leh ringtu inkara nun dantur a kawhmuha, a ngenin a ngen lova, titurin thu a pe. Chu chu Isua nihna chu a ni. Chu nihna chu kan chan ve phak a ni lova. Amaherawhchu, pawl ho anga kan awm avangin hruaitu awm a ngaia, keini hohi chutianga Kawnpui Chhimveng Kristian Thalai Pawl hruaitu chu kan ni.

Sipai-ah chuan hotu an awma, thuneihna an neiin laltakin ro an rela, hotu thu zawm loh chu a hlauhawmin a pawi thei hle. Isua erawhchu chutiang ni mah se la, hruaitu nihna a kengtela, amah zuitute tan entawntlak a ni a, zuitlakin a nung bawk. Amah ringa zuitute tan an harsatna, kawng tinrengah a tanpuiin, an chak loh changin a dawm kanga, hmangaihnain a tuam hlawm thin.

Heng atang hian hruaitu nihna leh tihtur chu kan hre thei ta a, kan tihtur leh nihna kan zirho tawh dawn a ni.

2. Hruaitu kan nihnaa kan tihtur leh mawhphurhna te-

(1) Hruaitu kan nihna, kan hote kawng dika hruai :

Kan kawng zawh hi min zuitute tan kalna chi a nih leh kalna atan kawng him a ni tur a ni. Tunlai hunah Thalai rualte tan kawng himlo, zawhtlak loh kawng a tam em em mai, a nuam leh hlimawm apiang an uma, an tana tha tluantling lo kawng an zawha, a tawpah an nunin a chhiatphaha, hun lo taka thihna hial an tuar thin. Chuvang chuan kawng him, kawng dikah hruai an ngai, chutianga an mahni hruaitur chuan hmangaih leh lainat chunga an mahni hruaitura kan inbuatsaih a ngai a ni.

Mi thenkhat te’n ‘tunlai chu hun a danglam tawha, mitha leh mifel a huhovin an awma, misual leh mi fello te chu chutiang bawkin an awm, mihring hi chutiang chuan an inthen phawk tawh a ni’ an ti a, hei hi a dik a nih chuan kan rawngbawlna hi kan thelh chiang hle tihna a ni a, zuitlak loh hruaitu kan ni tihna a ni ang.

Mi thenkhat leh chuan KTP chu an intirimrema, an bula awm a hahthlak an ti bawk, chutianga hruaitu inkawm binga, midang te’n kan bula awm nuam lo an ti a nih phei chuan kawng dika hruaiturin engti kawng mahin kan thei dawn lova, a pawi leh zual dawn a ni. Thalai rual, ruihhloin a tihbuaite chhanchhuah ngai chhanchhuaka kawng dika hruaiturin eng rilru pua enkawltur nge tihte hi kan ngaihtuah a ngaia, mithiam te chuan heng mi te hi damlo, natak tuar an ni a, ngaihsak an mamawh em em a ni an ti a, chutianga enthei tur chuan hmangaih an ngai a ni.

(2) Lusun tuarpuina-ah :

Lal Isuan damlo leh lusun a ngaihsak zia Bible-in min hrilh. Damlo, natna tinreng tuar a tidama, mitdel, bengngawng, kebai, etc. an natna a ti dama, amah an bawr huai huai pawhin hreawm a ti ve lo. Mitthi a kai thoa, enkawl zui an mamawhnaah enkawl zui turin a ti.

Mitthi hi anmahni a lainat hrim hrim vanga kaitho ni lovin, a suntute a lainat vanga ti ni zawkin a lang, Nain khaw hmeithai fa kaihthawh te, Lazara kaihthawh te kha a suntute sunna kha Isuan a lainat a ni tih kan hmu thei.

Keini Mizote hi lusun intuarpuia, inthlamuan tura inlenpui thin hnam kan ni a, kan va lena, an bula kan va awm mai hian kan thlamuan a ni a, chu chu Lal Isua rawngbawlna kan chhunzawmna a ni a, kan ngaihpawimawh reng hi a ngai a ni. Sapho chuan Miithi ruang hi mitthi dahna hmunah an dah maia, an chenna hmunah an la lut ngai lo a ni awm e. Vaiho hian pawnah, varanda-ah te an dah maia, inchhungah chuan an inlenpui ve tho va, a thenin lehkha te an denga, chutiang chuan an inlenpui ve thin.

Keini mizote chu ruang inchhungah kan daha, chhungkhat laina te’n an thut huala, an thi tawh hmel hmu rengin, rilru hrehawmin zankhuain kan awma, chumi hnemtur chuan vanlam ngaih hla sain zankhuain kan inlenpuiin kanintuarpui thin. Heng hunte hi hruaitu kan nihna kan tihlan hun tur pawimawh tak chu a ni. Isua Lazara thlana a tapte kha Mari leh Marthii te tan khan an phurrit chhawktu tha a tling ngei ang, heng hunah te hian tuarpuina hmel tilang ila, nui vur vur leh thiante be mai mai lovin, thahnemngaitakin zaia tuartu chhungkua tuarpuiin awm ila, Lal Isua rawngbawlna kan chhunzawmna a niin, hruaitu kan nihnaa kan mawhphurhna a ni ngei ang.

(3) KTP hruaitu kan nihna-ah :

KTP chu kohhran tichak tura missionary te kaihhruainaa din a nih angin a tihtur/thiltum pawh- Thalaite kristianna kawnga hruaite, kohhran kutke ni tura thalaite buatsaihte, kohhran hnathawh tihpuitlinte, chanchintha puandarh te a ni a, hengah hian hruaitu chu thalai te hmaa kala, hruaitu a nih anga hmahruaitu nih tum tur a ni, chu chu a mawhphurhna chu a ni.

Kohhran hnathawhhona-ah a sira lo thua, thawhtur lo sawi zung zungte hi kan hote ngei leh nin kan ni duh hle. Hruaitu kan nih avangin a reltu kan nih chu a ngaia kan rel anga thawhturah hma kan hruai bawk ang. Chutiang zel chuan Pathian biak inkhawmna-ah te, tualzal nun thlengin mi entawn ni turin tan kan la ang a, kan nung bawk tur a ni.

Tunlaiah Krismas hunpui kan hmanah te hian thalai rual te’n hlimhlawp leh nawmsip bawl nan kan hmang ta mai em ni tihturin kan awm niin a lang. Thianho inbawkkhawma, khawi hmunah emaw thil eiho tur siama, lo tihho let let a tam ta hle mai niin a lang. Heng hunte hi Krista kan tana a inpekna lawma thlarau lam hlawkna kan hmuh theih nana hmang turin kohhranin ruahmanna a siama, Pathian faka, pawla, thlarau lam malsawmna a thar kan chan theih nana lenkhawm buatsaihna hmunte chu kal tur mumal pawh kan awm ta mang lo.

Chungte avang chuan vawiina hruaitu kalkhawmte hian ‘Hruaitu mawhphurhna’ kan zirho atang te, kan sawi piah lam atangte pawhin ngaihtuahna thar hmangin, hmalam pan turin kan mawhphurhna i hre thar ang u.

A tawp ber atan hruaitu mawhphurhna kan sawi hian engchen nge tihah hian kan rilruah kan ngaihtuah maithei. Vawiinah chuan KTP hruaitu kalkhawmin kan zir avangin chumi chauha hmanturah chuan kan ngai maithei, a dikna chen awm mahse a tawk lovang. Eng pawlah pawh hruaitu kan nihna apiangah hmahruaitu nih hi kan awmdan tur a ni. NPSS zirtirtu kan nihna-ah te hlei hlei a pawimawh, naupangte hian engkimah min ringa, min entawn reng a ni tih hria ila. Pawn lamah pawh kan hmuhna apiangah bia ila, kan hria a ni tih an hriat hian an lawm em em a ni. 

Sawitur tamtak a awma, kan sawi seng lova, kan sawi chin atang hian tanlak kan ngaihna apiangah tan la thar turin i inbuatsaih ang u.

Sawiho tur :

(1) Khing kan sawi takte khi kan mawhphurhna-ah kan ngai thei em ?

(2) Kan mawhphurhna hlen turin eng harsatna nge neia kan inhriat, engtin nge kan hneh theih ang ?

(3) KTP hi khawtlang rawngbawlna-ah hian tun aia nasa hian inhmang se a tha em ?

(4) KTP hruaitu zinga i tel ve hi Pathianin a kohna che a ni tih i pawm thei em ?

***************